Posts Tagged ‘அண்ணா’

2987682193_5dff53581b

பள்ளி முடிந்து வரும்
மாலை  நேரங்களில் எனக்கான
நொறுக்குத்தீனி
எடுத்து வைப்பாயே
அதற்காகவேனும்

எனக்கான தட்டு கழுவியும்
சட்டை தேய்தும் பின்
நவீனத்துவ அன்பு
காட்டுவாயே
அதற்காகவேனும்

எங்க அண்ணா பின்னிவிடற
ஜடையே அழகு தான்
என செல்வியிடம்
சொல்லி  சிரிப்பாயே
அதற்காகவேனும்

கோபத்தின் உச்சத்தில்
போடா கழுதை என
சொல்லிவிட்டு வேகமாய்
வாசல் பக்கம் ஒடிப்போவாயே
அதற்காகவேனும்

அதிகாலை
தூக்க பொழுதுகளை
காதுக்குள் மையிலிறகு
நுழைத்து எழுப்புவாயே
அதற்காகவேனும்

அத்திலிச்சி பூனைக்கு
வயிறு வலிக்கிறதென
விக்ஸ் ஆக்ஸன் 500
மாத்திரையை பாலில்
கலந்து வைத்தாயே
அதற்காகவேனும்

என்னுடைய சட்டயை
அணிந்ததுக்காய் திட்டு
வாங்கியபடியே
பொத்துக்கொண்டுவரும்
அழுகையை அடக்க முயல்வாயே
அதற்காவேனும்

எதற்காகவேனும்
கடவுளிடம் சண்டையிட்டாவது
பிறந்துவிடு அடுத்த ஜென்மத்திலும்
என் அடங்காபிடாரி தங்கச்சியாக

நன்றி: இப்பதிவு யூத்ஃபுல் விகடன் குட் பிளாக்கில் பட்டியலிடப்பட்டுள்ளது

If you enjoyed this post, make sure you subscribe to my RSS feed!

இந்த கவிதை உயிரோசையில் வெளியாகிய என்னுடைய முதல் படைப்பு உயிரோசையில் வாசிக்க இங்கே செல்லவும்

mykitten

அரிசிக்கடை செட்டியார் வந்துவிட்டு போன மாலை நேரம்

எங்கள் அத்திலிச்சி பூனை பழுப்பு நிறத்தில் ஒன்று, வெளிர் மஞ்சள்

நிறத்தில் இரண்டு , கருப்பு நிறத்தில் ஒன்று என நான்கு குட்டிகள்

ஈன்றது வெளிர் மஞ்சள் குட்டிகளை அப்பா எப்போதும்

செம்பட்டயன் என்றே அழைப்பார்

பூனை ஐந்து குட்டிகள் போட்டது என்றும் ஒன்றை அதுவே தின்று

விட்டதாகவும் அண்ணன் சொன்னான். கோட்டாம்பட்டியில் குடி

இருக்கும் போது அம்மா சமைத்த நண்டு தொண்டையில் சிக்கி ஒரு

பூனை குட்டி இறந்து போனதாக அப்பா எப்போதும் அம்மாவை

திட்டுவார்.

அம்மா அமைதியே உருவானவள் அப்படியெல்லாம்

செய்யமாட்டாள் என்பது என் திண்ணம் .

அடுத்த நாள் லட்டு வாங்கி திரும்புகையில் இறந்த பூனைக்கு

படையல் இட்டு அஞ்சலி செலுத்த வேண்டும் என்ற என்னிடம்,

அதற்கான தொகையாய் என் பங்கு லட்டையும்

பெற்றுக்கொண்டான் அண்ணன்.

பின்பு வந்த பிறந்தநாள் கொண்டாத்தில் மறந்தே போனோம்

செம்பட்டயன் இறுதிசடங்கை ,யாருக்கும் நினைவிருக்காது

அது இறந்தது ஆகஸ்ட் 11 , அன்று நல்ல மழை

If you enjoyed this post, make sure you subscribe to my RSS feed!

டேய் அண்ணா சண்ட வெச்சுக்கலமா ?

Posted: செப்ரெம்பர் 26, 2008 by அடலேறு in நட்பு
குறிச்சொற்கள்:,

டேய் அண்ணா , உன்னை அண்ணா என்று அழைத்ததாக நியாபகமே எனக்கு இல்லை. ஒன்றுமே அறியாத கடை குக் கிராமதிலிருந்து என்னை இந்த உலகத்திற்கு அறிமுகம் செய்தவன் நீ!!! உனக்கு நியாபகம் இருக்கிறதா காலையில் இருந்து மாலை வரை கிணற்றில் குதித்து விளையாடியது. கொரங்கு பிடல் சைக்கிள் முதல் ராம் குமார் கிணற்றில் நீச்சல் வரை கற்று கொடுத்தவனே நீ தான்.உனக்கு நீச்சல் தெரியாது என்று நான் கேலி செய்யும் போதெல்லாம் நீருக்குள் என்னை அழுத்த வருவாய், ஆனால் அழுத்துவது போல் அழுத்தி மேலே தூக்கி விடுவாயே அதில் கொட்டி கிடக்கும் உனக்கு என் மீதான அன்பு. ஆனால் அப்பாவின் சைக்கிள் துடைப்பதில் மட்டும் என்னை மாட்டி விடுவாய்.

சிறு வயதில் இருந்தே உனக்கும் எனக்கும் எப்போதும் சண்டை தான். உனக்கு விளையாட தெரியாத கிரிகெட் முதல் நான் ,நீ , ரவி , அபிராமி, அனு,விளையாடும் கபடி வரை. முருகானந்தம் விளையாடும் பம்பரம் முதல் நானும் நீயும் விளையாடும் சதுரங்கம் வரை. செவ்வாய்கிழமை சந்தையில் வாங்கும் பஜ்ஜி முதல் அப்பா வாங்கி வரும் நெல்லை அல்வா வரை . என்னுடன் எதிலும் ஒத்து போகதவன் நீ.

நானும் நீயும் சண்டையிடும் போதெல்லாம் அதிகமாக நீ தான் விட்டு கொடுப்பாய் எதற்கு எடுத்தாலும் முரண்டு பிடிப்பேன் நான். எனக்கே தெரியும் என்னிடம் பொய்யாக தோற்றுப் போவாய் பலமுறை எனக்காக.

ஆனால் நம் சண்டைக்கு இடைஞ்சலாக வந்தது உன் பொறியியல் படிப்பு. விடுதியில் தான் தங்கி படிக்க வேண்டும் என்ற நிலை உனக்கு, நீ இல்லாமல் எப்படி பொழுதை கழிப்பது என்ற கவலை எனக்கு. நீ கல்லூரி சேரப்போகும் அந்த நாள் உனக்கு தெரியுமா தலையனைக்கு அடியில் நானும் நம் பூனையும் முகம் புதைத்து அழுதது கூட எனக்கு இன்னும் நினைவு இருக்கிறது. விடுமுறை எப்போது வரும் நீ எப்போது வருவாய் உன்னுடன் ஜாலியாக பொழுதை களிக்கலாம் என்றே நினைப்பேன். நீ வரும் வார இறுதி நாட்களில் ஜோசுவா கடை கோழி ஒன்றிக்கு இறுதி சடங்கு எப்போதும் நடக்கும்.

நீ வரும் விடுமுறை நாட்களில் போது கூட நீயும் நானும் சண்டை போடுவதற்கு நேரமே கிடைக்காது. அப்போதெலாம் என்னிடம் பேசுவதயே குறைத்தாய். வார்த்தைகளை வாய்க்குள்லேயே முளுங்குவாய். உன்னிடம் தொலைபேசியில் பேசும் போதெல்லாம் நினைப்பேன் போடா “முட்டை கண்ணா” என்று சொல்ல வேண்டும் என்று ஆனால் அப்பா தான் என்னை உன்னுடன் பேசவே விடமாட்டார். பேசினாலும் சண்டை தானே போட போகிறாய் சும்மா இரு என்று . கடைசியாக நானும் நீயும் போட்ட சண்டை நியாபகம் இருக்கிறதா உன்னுடைய நீலகலர் சட்டைக்காக.

காலத்தின் கைகளில் வருடங்கள் பல உருண்டு ஓடின. இப்போது நீயும் நானும் மென்பொருள் பொறியாளர்களாக நீ எதோ ஒரு மூலையில் நான் எதோ ஒரு மூலையில். நம்மை பற்றி நினைக்கும் போதெல்லாம் இதழின் கடைசி பகுதியில் வந்து நிற்கும் உனக்கான ஒரு புன்னகை . இப்போதும் கேட்கிறேன் உன்னிடம்

சண்ட வெச்சுக்கலமா????

ஆனால் இந்த முறை ஒரு விதி விலக்கு தோற்பது நானாக தான் இருக்க வேண்டும்

//உங்களுக்கும் உங்க அண்ணா நியாபகமா அப்ப சொல்லுங்க பின்னுட்டத்துல//


If you enjoyed this post, make sure yousubscribe to my RSS feed!